احنا مين
أول مرة سمعت فيها عن التمرين في البيت كانت بالصدفة، لما شفت فيديو على اليوتيوب لحد بيحكي تجربته، وازاي عمل جسم كويس وفورمة في البيت،
ساعتها بصراحة مصدقتش! مع إنه كان بالنسبالي الحل السحري لمشاكلي مع نزول الجيم!
ولأني كنت زي أي حد يومه مشغول، معنديش رفاهية إني احدد معاد انزل فيه من البيت واروح مشوار لحد الجيم اقعد فيه أقل حاجة ساعة، وارجع تاني نفس المشوار!
يعني تقريبا ساعتين من اليوم هخصصهم للجيم …
وبصراحة مكانتش دي هي المشكلة الوحيدة …
لأني لما حاولت اروح كذا مرة كنت بحس إن الموضوع معقد ويتوه وتمارين وأجهزة كتير …
والحقيقة أنا عندي حاجة كدة، لما ببقى مش فاهم الحاجة كويس، ومش فاهم كل تفاصيلها وبعمل كل حاجة ليه وازاي،
مش بعملها بنفس الكفاءة والشغف زي لما اكون فاهمها كويس،
وده اللي خلاني ابدأ اقرأ أكتر عن التمرين والرياضة والتغذية،
ومع الوقت بدأت افهم أكتر …
بس فكرة التمرين في البيت دي كانت لسه في دماغي، وكنت شايف أنها حل سحري لو عرفت اطبقه!
فبدأت ادور على طرق للتمرين في البيت، وايه الأدوات أو الحاجات اللي ممكن احتاجها والفرق بينهم وساعتها لقيت إنه عالم كبير ومليان تفاصيل كتير …
من أول الأجهزة اللي زي أجهزة الجيم بس أصغر شوية أو كذا جهاز في جهاز واحد،
لحد الأوزان الحديد والكاوتش والبلاستيك والأسمنت،
كل دي أدوات بتتباع وكل حاجة فيهم فيها جودات وأنواع وخامات كتير..
وأثناء ما أنا بدور، لفت نظري حاجة اسمها أساتك المقاومة!
وفي ناس بتقول عليها أحبال المقاومة ..
بصراحة في الأول من اسمها حسيت أنها حاجة ضعيفة ملهاش لازمة أو مش بتجيب نتيجة أو بتتقطع بسهولة!
بس لما دورت أكتر لقيت فيها أنواع محترمة جدًا، وجودات وخامات كويسة ويعتمد عليها،
ولقيت كمان أبحاث معمولة عنها وأنها ليها نفس تأثير ونتيجة الأوزان الحديد … وفي طبعًا خامات وجودات سيئة جدًا …
في اللحظة دي كانت فكرة “لياقتك في البيت” بدأت تتكون في دماغي،
قلت ليه معملش حاجة أساعد بيها الناس اللي زيي، بدل ما يضطروا يبحثوا ويدوروا فترة كبيرة ويجربوا أدوات كتيرة،
ليه موفرش عليهم وقت كبير من البحث، وكمان فلوس في تجربة الأدوات وممكن حد يجيب حاجة مش محتاجها ومش هيستخدمها أصلًا!
وعشان أكون بفيد الناس بأقصى صورة ممكنة،
قررت ابحث عن مدربين متخصصين ومعاهم شهادات معتمدة في التدريب والتغذية …
عشان يكونوا معايا بحيث نقدم للناس حاجة متكاملة،
ونوفرلهم كل اللي هيحتاجوه من معلومات وأدوات واستشارات ومتابعة في التمرين والتغذية،
علشان نساعدهم يوصلوا للهدف اللي هما عايزينه …
واتفقت فعلًا مع أحد المدربين الشاطرين جدًا، وحاصل على شهادة PT من Gold’s academy وليه خبرة كبيرة في عالم كمال الأجسام والتدريب والتغذية بقاله 12 سنة تقريبًا ما شاء الله
ومن أول الحاجات اللي اشتغلنا عليها في فريق “لياقتك في البيت” هو كتاب “دليلك الشامل للتمرين في البيت”
وقررنا نقدمه بشكل مجاني تمامًا بمناسبة بداية انطلاقنا، لو موصلكش الكتاب على الايميل ابعتلنا هنا وهيوصلك حالًا، استغل فرصة أنه مجاني حاليًا، وحمله … والأهم أنك تقرأه وتطبقه!
وأخيرًا اتمني مكونش طولت عليك وتكون عرفت احنا مين ..
وأهم حاجة دلوقتي تكون قررت تبدأ رحلتك في تغيير شكل جسمك واللي حياتك كلها هتتغير معاه!
اسيبك مع الكتاب .. حمله دلوقتي واقرأه وابدأ في تطبيقه .. ولو عندك أي اسئلة احنا معاك في أي وقت